യു.കെ-യിലെ ആരോഗ്യമന്ത്രിയും കൺസർവേറ്റീവ് എംപിയുമായ നാദിൻ ഡോറിസിന് കൊറോണ വൈറസ് പോസിറ്റീവ് ആണെന്ന് കണ്ടെത്തി. എല്ലാ മുൻകരുതലുകളും സ്വീകരിച്ചിട്ടുണ്ടെന്നും വീട്ടിൽ സ്വയം ഐസൊലേറ്റ് ചെയ്യുകയാണെന്നും അവര്‍ വ്യക്തമാക്കി. അതോടെ ബ്രിട്ടണില്‍ കോവിഡ്-19 ബാധിതരുടെ എണ്ണം മൊത്തം 382 ആയി. ആറുപേരാണ് മരണപ്പെട്ടത്. മന്ത്രിയെന്ന നിലയില്‍ കഴിഞ്ഞ ഒരാഴ്ചക്കിടെ ഡോറിസ് നിരവധി പേരുമായി സമ്പര്‍ക്കം പുലര്‍ത്തിയിട്ടുണ്ട്. അടുത്തിടെ പ്രധാനമന്ത്രി ബോറിസ് ജോൺസണൊപ്പം ഒരു സ്വീകരണ പരിപാടിയില്‍ പങ്കെടുക്കുകയും ചെയ്തിരുന്നു.
കഴിഞ്ഞ ദിവസങ്ങളിൽ മിസ് ഡോറിസ് ബന്ധപ്പെട്ടിട്ടുള്ള എല്ലാവരുടെയും പേരുവിവരങ്ങള്‍ ശേഖരിക്കാനുള്ള ശ്രമത്തിലാണെന്ന് ആരോഗ്യവകുപ്പ് വ്യക്തമാക്കി. സുഖാന്വേഷണം നടത്തിയ എല്ലാവരോടും നന്ദി പറഞ്ഞ ഡോറിസ് 84 വയസ്സുള്ള തന്‍റെ അമ്മയെ കുറിച്ചോര്‍ത്താണ് പേടിയെന്നും പറഞ്ഞു.
അതേസമയം, കൊറോണ വൈറസ് മൂലമുണ്ടായ സാമ്പത്തിക പ്രത്യാഘാതങ്ങളെ മറികടക്കാന്‍ ബാങ്ക് ഓഫ് ഇംഗ്ലണ്ട് പലിശനിരക്കിൽ അടിയന്തര വെട്ടിക്കുറവ് പ്രഖ്യാപിച്ചു. നിരക്കുകൾ 0.75 ശതമാനത്തിൽ നിന്ന് 0.25 ശതമാനമായി കുറച്ചിട്ടുണ്ട്. മറ്റൊരു കാര്യം, ആഴ്സണലിനെതിരായ മാഞ്ചസ്റ്റർ സിറ്റിയുടെ പ്രീമിയർ ലീഗ് മത്സരം മുന്‍കരുതലുകളുടെ ഭാഗമായി മാറ്റിവെച്ചു.
