കാബൂള്‍: അഫ്ഗാനിസ്ഥാനില്‍ ഐ എസ് ഭീകരര്‍ അശാന്തി സൃഷ്ടിക്കുകയാണെന്ന് താലിബാന്‍ ഭരണകൂടം. അഫ്ഗാനിലെ വിദേശകാര്യ മന്ത്രി ആമിര്‍ ഖാന്‍ മുത്തഖിയാണ് ഐ എസിനെതിരെ വിമര്‍ശനവുമായി രംഗത്തെത്തിയിരിക്കുന്നത്. കഴിഞ്ഞ വര്‍ഷം 1800-ഓളം ഭീകരവാദികളെ മോചിപ്പിച്ചിരുന്നു. അവര്‍ രാജ്യത്തുടനീളം അശാന്തി സൃഷ്ടിക്കുകയാണ് എന്നാണ് ആമിര്‍ ഖാന്‍ മുത്തഖി ആരോപിക്കുന്നത്. താഷ്‌കന്റില്‍ നടന്ന രാജ്യാന്തര സമ്മേളനത്തിലാണ് അദ്ദേഹം ഇക്കാര്യം അറിയിച്ചത്.
അടുത്തിടെ അഫ്ഗാനിസ്ഥാനിലുടനീളം പളളികള്‍ക്കും സ്കൂളുകള്ക്കും വാഹനങ്ങള്‍ക്കും നേരേയുണ്ടായ ആക്രമണങ്ങളെല്ലാം ഐ എസ് ആസൂത്രണം ചെയ്തതാണെന്നും ആമിര്‍ ഖാന്‍ മുത്തഖി പറഞ്ഞു. അഫ്ഗാനില്‍ കഴിഞ്ഞ കുറച്ചുമാസങ്ങളിലായി പളളികള്‍ക്കും സ്കൂളുകള്ക്കും നേരെ നിരവധി ചാവേര്‍ ആക്രമണങ്ങളും സ്‌ഫോടനങ്ങളും റിപ്പോര്‍ട്ട് ചെയ്തിരുന്നു. ഈ ആക്രമണങ്ങളുടെയെല്ലാം ഉത്തരവാദിത്വം ഐ എസാണ് ഏറ്റെടുത്തത്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
താലിബാന്‍ അധികാരത്തിലേറിയപ്പോഴാണ് തടവിലുണ്ടായിരുന്ന ആയിരത്തിലധികം ഐ എസ് ഭീകരരെ മോചിപ്പിച്ചത്. തങ്ങള്‍ക്ക് എ എസിനെ നേരിടാനും അടക്കിനിര്‍ത്താനും സാധിക്കുമെന്ന അവകാശവാദമുന്നയിച്ചായിരുന്നു ഭീകരവാദികളെ തുറന്നുവിട്ടത്. താലിബാന്റെ ഈ നടപടിക്കെതിരെ യുഎസ് രംഗത്തെത്തിയിരുന്നു. അവരെ മോചിപ്പിക്കുന്നത് ഐ എസും അല്‍ഖ്വായ്ദയും അഫ്ഗാനില്‍ ശക്തിയാര്‍ജ്ജിക്കാന്‍ കാരണമാകും എന്നായിരുന്നു യുഎസ് നല്‍കിയ മുന്നറിയിപ്പ്.
