കീവ്: റഷ്യന് പ്രസിഡന്റ് വ്ളാഡിമര് പുടിന്റെ അവസാന നാളുകള് അടുത്തെന്ന് മുന് ലോക ചെസ് ചാംപ്യനും പുടിന് വിമര്ശകനുമായ ഗാരി കാസ്പറോവ്. താനൊഴികെ ബാക്കിയെല്ലാവരെയും രാജ്യശത്രുവായി പ്രഖ്യാപിക്കുന്ന പുടിന്റെ പതനം അനിവാര്യമാണെന്നും അജയ്യനായ പരമോന്നത നേതാവ് എന്ന അദ്ദേഹത്തിന്റെ പരിവേഷം നഷ്ടമായെന്നും ഗാരി കാസ്പറോവ് പറഞ്ഞു. കീവ് പോസ്റ്റിന് നല്കിയ അഭിമുഖത്തിലാണ് അദ്ദേഹം ഇക്കാര്യം പറഞ്ഞത്.
യുക്രൈന് അധിനിവേശമുള്പ്പെടെയുളള വിഷയങ്ങളില് പുടിനെതിരെ നിരന്തരം വിമര്ശനമുന്നയിക്കുന്നയാളാണ് ഗാരി കാസ്പറോവ്. കഴിഞ്ഞ ദിവസം റഷ്യയുടെ സാമ്പത്തിക നിരീക്ഷണ വിഭാഗം അദ്ദേഹത്തെ തീവ്രവാദിപ്പട്ടികയില് ഉള്പ്പെടുത്തിയിരുന്നു. ഈ പട്ടികയില് ഉള്പ്പെടുത്തുന്നവരുടെ ബാങ്ക് അക്കൗണ്ടുകള് പിടിച്ചെടുക്കാം. ഇവര് റഷ്യയിലെ ബാങ്ക് ഇടപാടുകള്ക്ക് മുന്കൂര് അനുമതി തേടണം. കാസ്പറോവിനെ പട്ടികയില് ഉള്പ്പെടുത്തിയതിന്റെ കാരണം അധികൃതര് വ്യക്തമാക്കിയിട്ടില്ല.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
പുടിന് ഭരണത്തോട് വിയോജിപ്പ് രേഖപ്പെടുത്തുന്നവരെയും വിമര്ശിക്കുന്നവരെയും 'തീവ്രവാദികള്' എന്നും 'വിദേശ ഏജന്റുമാര്' എന്നും വിളിക്കുന്നതായി വിമര്ശനമുയര്ന്നിട്ടുണ്ട്. 2014-ല് റഷ്യ വിട്ട ഗാരി കാസ്പറോവ് യുഎസിലാണ് താമസം. 2022-ല് അദ്ദേഹത്തെ പുടിന് ഭരണകൂടം വിദേശ ചാരന്മാരുടെ പട്ടികയില് ഉള്പ്പെടുത്തിയിരുന്നു.