വെനിസ്വേലന് പ്രസിഡന്റ് നിക്കോളാസ് മഡുറോ ഭരണകൂടം ആസൂത്രിതമായി മനുഷ്യാവകാശ ലംഘനങ്ങള് നടത്തിയതായി ഐക്യരാഷ്ട്ര സംഘടന. ഭരണകൂടത്തിനെതിരായ എതിര് ശബ്ദങ്ങള് ഇല്ലാതാക്കാനായി മഡുറോയും അദ്ദേഹത്തിന്റെ ആഭ്യന്തര, പ്രതിരോധ മന്ത്രിമാരും കുറ്റകൃത്യങ്ങള് ആസൂത്രണം ചെയ്തതിനുള്ള വ്യക്തമായ തെളിവുകള് തങ്ങളുടെ റിപ്പോര്ട്ടിലുണ്ടെന്ന് അന്വേഷണ ഉദ്യോഗസ്ഥര് പറഞ്ഞു.
പ്രത്യേകിച്ചും, ജുഡീഷ്യല് ഉത്തരവില്ലാതെ എതിരാളികളെ കസ്റ്റഡിയിലെടുക്കാന് ദേശീയ രഹസ്യാന്വേഷണ വിഭാഗത്തോട് മഡുറോ ഉത്തരവിട്ടതായി യുഎന് ഫാക്റ്റ് ഫൈന്ഡിംഗ് മിഷന് വ്യക്തമാക്കുന്നു.
ഇരകള്, സാക്ഷികള്, മുന് ഉദ്യോഗസ്ഥര്, അഭിഭാഷകര് തുടങ്ങിയവരുമായി നടത്തിയ 270 ലധികം അഭിമുഖങ്ങളും രഹസ്യ രേഖകളും അടിസ്ഥാനമാക്കിയാണ് റിപ്പോര്ട്ട്. നാഷണല് ഇന്റലിജന്സ് സര്വീസ് മുന് മേധാവി ജനറല് ക്രിസ്റ്റഫര് ഫിഗുവേരയുടെ വെളിപ്പെടുത്തലുകളും ഇതില് ഉള്പ്പെടുന്നുണ്ടെന്ന് ഉദ്യോഗസ്ഥര് പറഞ്ഞു.