ഇന്ത്യയുടെ ബഹിരാകാശ പദ്ധതികളുടെ കംപ്യൂട്ടര് സംവിധാനത്തില് ചൈന നുഴഞ്ഞുകയറാന് ശ്രമിക്കുന്നുവെന്ന് റിപ്പോര്ട്ടുകള്. 2012 മുതല് 2018 വരെ ചൈനീസ് ഹാക്കര്മാര് ഇതിനായി പരിശ്രമിക്കുന്നുണ്ടെന്ന് അമേരിക്ക ആസ്ഥാനമായ ചൈന എയ്റോസ്പേസ് സ്റ്റഡീസ് ഇന്സ്റ്റിറ്റ്യൂട്ടിന്റെ റിപ്പോര്ട്ടില് സൂചിപ്പിക്കുന്നു.
ശത്രുരാജ്യങ്ങളുെട ചാര ഉപഗ്രഹങ്ങളെ ബഹിരാകാശത്തുവെത്ത് വെച്ച് തകര്ക്കാന് കഴിവുള്ള ആന്റി സാറ്റലൈറ്റ് മിസൈല് സംവിധാനം ഇന്ത്യ വികസിപ്പിച്ചിരുന്നെങ്കിലും ചൈനയ്ക്ക് അതെല്ലാം മറി കടക്കാന് കഴിയുന്ന മികച്ച പദ്ധതികളുണ്ടെന്നും റിപ്പോര്ട്ടില് പറയുന്നു. 2017ല് ചൈന ഇന്ത്യയുടെ ഉപഗ്രഹ നിയന്ത്രണ സംവിധാനത്തില് കയറിപ്പറ്റാന് നടത്തിയ ആക്രമണമാണ് ഇതില് ഒടുവിലത്തേത്. 2012 ല് ഐഎസ്ആര്ഒയുടെ ജെറ്റ് പ്രൊപ്പല്ഷന് ലാബോറട്ടറിയുടെ നിയന്ത്രണം പൂര്ണമായും കൈക്കലാക്കാന് ചൈനീസ് ഹാക്കര്മാര് ശ്രമിച്ചതായിരുന്നു ഏറ്റവും വലിയ ആക്രമണം.
എന്നാല് ഹാക്കിങ് ശ്രമങ്ങളില് ഐഎസ്ആര്ഒയുടെ കംപ്യൂട്ടര് സംവിധാനം കീഴ്പെടില്ലെന്നാണ് വിലയിരുത്തല്. ചൈനീസ് ആക്രമണങ്ങളെക്കുറിച്ച് വ്യക്തമായി മനസിലാക്കാന് ഐഎസ്ആര്ഒയ്ക്ക് ഇതുവരെ സാധിച്ചിട്ടിട്ടില്ല. ആന്റി സാറ്റലൈറ്റ് മിസൈലുകള്, കോ- ഓര്ബിറ്റല് സാറ്റലൈറ്റുകള്, ജാമറുകള് തുടങ്ങിയ സംവിധാനങ്ങള് ഉള്പ്പെടെ ഭൂസ്ഥിര ഭ്രമണപഥത്തിലുള്ള ഉപഗ്രഹങ്ങളെ പോലും തകര്ക്കാന് ശേഷിയുള്ള സംവിധാനങ്ങള് ചൈനയ്ക്കുണ്ടെന്നും ചൈന എയ്റോസ്പേസ് സ്റ്റഡീസ് ഇന്സ്റ്റിറ്റ്യൂട്ടിന്റെ റിപ്പോര്ട്ടില് പറയുന്നു.