ഷെഞ്ചൻ ഫ്രീ-ട്രാവൽ സോണ് അടച്ചിടാന് യൂറോപ്യൻ കമ്മീഷൻ ഒരുങ്ങുന്നു. കൊറോണ വൈറസിന്റെ വ്യാപനം പരിമിതപ്പെടുത്തുന്നതിന്റെ ഭാഗമായി നടപടികള് ശക്തമാക്കാന് നേതാക്കളോട് ആവശ്യപ്പെടുമെന്ന് കമ്മീഷൻ പ്രസിഡന്റ് ഉർസുല വോൺ ഡെർ ലെയ്ൻ പറഞ്ഞു. യൂറോപ്യൻ യൂണിയന്റെ ബാഹ്യ അതിർത്തികൾ അടയ്ക്കണമെന്ന് ഫ്രഞ്ച് പ്രസിഡന്റ് ഇമ്മാനുവൽ മാക്രോൺ നേരത്തെ പറഞ്ഞിരുന്നു. യൂറോപ്യൻ ഇതര രാജ്യങ്ങളും യൂറോപ്യൻ യൂണിയൻ രാജ്യങ്ങളും തമ്മിലുള്ള യാത്രാ ബന്ധം താല്ക്കാലികമായി നിർത്തിവയ്ക്കുമെന്നും അദ്ദേഹം പറഞ്ഞിരുന്നു.
എന്നാല് ദീർഘകാലമായി യൂറോപ്പില് താമസിക്കുന്നവര്, യൂറോപ്യൻ യൂണിയൻ പൗരന്മാർ, നയതന്ത്ര ഉദ്യോഗസ്ഥർ, ആരോഗ്യ പ്രവർത്തകര് എന്നിവരെ വിലക്കില് നിന്നും ഒഴിവാക്കുമെന്നും ഉർസുല വ്യക്തമാക്കി. കുറഞ്ഞത് 30 ദിവസമെങ്കിലും നടപടികൾ നീണ്ടുനില്ക്കുമെന്നാണ് സൂചന. പരിശോധനയില്ലാതെ യൂറോപ്യൻ യൂണിയൻ രാജ്യങ്ങൾക്കിടയിൽ സ്വതന്ത്രമായി സഞ്ചരിക്കാനുള്ള പാതയാണ് ഷെഞ്ചൻ ഫ്രീ-ട്രാവൽ സോണ്.