വാഷിംഗ്ടണ്‍: യുഎസില്‍ മൂന്ന് ഫലസ്തീനിയന്‍ വിദ്യാര്‍ത്ഥികള്‍ക്ക് വെടിയേറ്റു. ശനിയാഴ്ച്ച വൈകുന്നേരം വെര്‍മണ്ട് യൂണിവേഴ്‌സിറ്റി ക്യാംപസിനു സമീപമായിരുന്നു സംഭവം. ഹിഷാം അവര്‍ത്തനി, തഹ്‌സീന്‍ അലി, കെനാന്‍ അബ്ദുല്‍ഹമീദ് എന്നിവര്‍ക്കാണ് വെടിയേറ്റത്. ഇവരില്‍ രണ്ടുപേര്‍ യുഎസ് പൗരത്വമുളളവരും മറ്റൊരാള്‍ നിയമപരമായ താമസക്കാരനുമാണ്. തെരുവിലൂടെ നടക്കുകയായിരുന്ന വിദ്യാര്‍ത്ഥികളെ വെടിവെച്ച ശേഷം അക്രമി കടന്നുകളയുകയായിരുന്നു. വെടിയേറ്റ രണ്ടുപേരുടെ നില ഗുരുതരമാണെന്നും ഒരാള്‍ അപകടനില തരണം ചെയ്തുവെന്നും ബര്‍ലിംഗ്ടണ്‍ പൊലീസ് മേധാവി ജോണ്‍ മുറ അറിയിച്ചു.
വംശീയതയാണ് ആക്രമണത്തിന് കാരണമെന്ന് അമേരിക്കന്‍ അറബ് ആന്റി ഡിസ്‌ക്രിമിനേഷന്‍ കമ്മിറ്റി (എഡിസി) ആരോപിച്ചു. ലഭ്യമായ വിവരം അനുസരിച്ച് മൂന്നുപേരും കെഫിയ ധരിക്കുകയും അറബി സംസാരിക്കുകയും ചെയ്യുന്നവരാണെന്നും ഇവര്‍ക്കുനേരെ ആക്രോശിച്ച അക്രമി ഉടന്‍ വെടിയുതിര്‍ക്കുകയായിരുന്നുവെന്നും എഡിസി ഡയറക്ടര്‍ ആബിദ് അയ്യൂബ് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
സംഭവത്തെ വിദ്വേഷ കുറ്റകൃത്യമായി കണക്കാക്കി അന്വേഷണം നടത്തണമെന്ന് വിദ്യാര്‍ത്ഥികളുടെ കുടുംബം ആവശ്യപ്പെട്ടു. അക്രമിയെ നിയമത്തിനുമുന്നില്‍ കൊണ്ടുവരാതെ തങ്ങള്‍ക്ക് സമാധാനമായിരിക്കാന്‍ കഴിയില്ലെന്നും ഇത്തരം സംഭവങ്ങള്‍ ഇനി ആവര്‍ത്തിക്കരുതെന്നും കുടുംബം പറഞ്ഞു. അടുത്തിടെ യുഎസിലെ ഇല്ലിനോയിസിലും ഫലസ്തീന്‍ സ്വദേശിയായ ആറുവയസുകാരന്‍ കൊല്ലപ്പെട്ടിരുന്നു. 26 തവണ കുത്തിയാണ് അക്രമി കുട്ടിയെ കൊലപ്പെടുത്തിയത്.
